Lífvörður 50 Cent barði ljósmyndara í Kaupmannahöfn

Rapparinn víðfrægi 50 Cent er nú staddur í Kaupmannahöfn og í gær kom til átaka á milli lífvarða hans og blaðamanna sem sátu um stjörnuna fyrir utan hótel í miðborginni. Lögregla skarst í leikinn og handtók einn lífvörðin sem má búast við ákæru fyrir líkamsárás.

Lífverðirnir höfðu skipað blaðamönnunum að hypja sig í burtu áður en rapparinn kæmi út en hann var á leiðinni til að halda tónleika í borginni. Ljósmyndararnir létu sér ekki segjast og þá réðst einn úr fylgdarliði stjörnunar á einn þeirra og tók hann hálstaki.

„Ég óttaðist um líf mitt" sagði maðurinn en að hans sögn reyndi lífvörðurinn að kyrkja hann auk þess sem hann fór inn í bílinn til ljósmyndarans og tók af honum myndavélina.