Eldur kviknaði í vörubíl

Eldur kviknaði í vörubíl við vigtunarplanið við afleggjara í grennd við Hvalfjarðargöngin í gærkvöldi. Slökkviliðsmaður segir að bíllinn hafi staðið þar mannlaus frá því í gær. Ekki sé vitað um upptök eldsins en leiða megi líkur að því að um íkveikju hafi verið að ræða.

Þá var dælubíll slökkviliðsins á höfuðborgarsvæðinu kallaður að heimahúsi á Lindargötu í miðborginni í nótt þar sem nágranni hélt að eldur hefði kviknað á svölum. Við eftirgrennslan slökkviliðsmanna kom hins vegar í ljós að eini loginn sem þar logaði var af kertaljósi. Ekki fylgir sögunni hvort þeir hafi tekið að sér að slökkva hann.