Samningsvilji bjargar HM-sumri knattspyrnufíkilsins

Samningsvilji er allt sem þarf til að gera HM-veisluna bærilega fyrir alla fjölskylduna. Þetta segja tveir fjölskylduráðgjafar en heimsmeistarakeppnin í fótbolta hefst í dag með tilheyrandi beinum útsendingum frá kappleikjunum.

Alls verða 64 leikir sýndir í beinni útsendingu á RÚV og Stöð 2 Sport og því má búast við miklu áreiti á þá fjölskyldumeðlimi sem engan áhuga hafa á knattspyrnu. Að sögn Önnu Sigurbjargar Sigurðardóttur og Hafliða Kristinssonar, sem bæði eru sálfræðingar og sinna hjónabandsráðgjöf, þá fer útkoma HM-veislunnar mikið eftir því hvernig fjölskyldan er innstillt.

„Þetta er ekki mikið vandamál ef allir í fjölskyldunni hafa áhuga," segir Hafliði og undir það tekur Anna Sigurbjörg. „HM gæti á þeim heimilum verið kærkomið tækifæri til að sameina alla fjölskylduna og gleyma öllum leiðindum," segir hún.

En þetta gæti skapað ákveðna togstreitu ef aðeins annar aðilinn er áhugasamur. Hafliði bendir á að afsökunin að þetta sé aðeins á fjögurra ára fresti haldi lítið, enski boltinn og meistaradeildin hafi verið í gangi allan veturinn þannig að þau rök falli um sjálf sig. „Þetta snýst líka mikið um hvers konar menning er í kringum þetta, ef þetta snýst um vini og bjórdrykkju þá er það eiginlega vandinn, vinirnir og drykkjan," segir Hafliði og bendir jafnframt á að samningsvilji beggja aðila sé allt sem þarf.

„Menn geta valið sér eitt lið og fylgst með því. Menn eru að biðja um einhverjar fórnir af hálfu hins aðilans en ef fólki tekst að semja og eitthvað annað kemur á móti þá á þetta ekki að vera neitt vandamál. Svo getur fólk líka búið til skemmtilega stemningu í kringum þetta," segir Hafliði.

Anna Sigurbjörg segir mestu erfiðleikana vera fólgna í því ef menn gangi fram og taki tíma fyrir þetta áhugamál eins og ekkert sé sjálfsagðara. Og hún bendir HM-fíklunum á að þráðurinn sé ögn styttri í fólki núna en áður vegna álagsins af efnahagshruninu.

 „Ef mönnum finnst þeir hafa sjálfkrafa rétt á þessu þá eru þeir að valta yfir hinn aðilann," segir Anna. Áhugamenn um HM þurfi því að vera tilbúnir að slá af sínum kröfum.

„Það er mjög mikilvægt að menn forgangsraði og pæli svolítið í því hverju þeir vilji alls ekki missa af og hverju þeir telji sig geta misst af," segir Anna. Mikilvægast sé hins vegar að fólk tali saman um hvernig þessu skuli háttað. „Fólk er oft með í maganum af því að þessir hlutir hafa ekkert verið ræddir og það veit ekki hverju það á að kvíða."