Segja málaliðaher auvirðilegt fyrirbæri

Samtök hernaðarandstæðinga (SHA) telja að einkarekinn flugher hollenska fyrirtækisins E.C.A. með 20 óvopnaðar orrustuþotur, sem leigðar verði til heræfinga, eigi ekkert erindi hér á landi.

„Málaliðaher eins og hér um ræðir er eitthvert auvirðilegasta fyrirbæri mannlegrar tilveru,“ segir í ályktun SHA. „Markmið rekstursins er að þjálfa hermenn í að drepa fólk í fjarlægum og fátækum löndum,“ segir í ályktuninni.

Áform fyrirtækisins stangist á við stefnu stjórnvalda um að Ísland skuli verða vettvangur friðarumræðu og vinna að afvopnun í heiminum.

Enn fremur segja hernaðarandstæðingar ljóst að E.C.A. Program sé hálfgert skúffufyrirtæki „og væntanlega leppur fyrir öflugri fyrirtæki“. Samtökin staðhæfa að kanadísk stjórnvöld hafi neitað fyrirtækinu um starfsleyfi. - pg