Nýtt útisvæði við sundlaugina í Eyjum tekið í notkun

Nýtt útisvæði var tekið formlega í notkun við Íþróttamiðstöð Vestmannaeyja í gær að viðstöddu fjölmenni.

Nú geta þeir sem sækja sundlaugina í Vestmannaeyjum farið í sjóðandi heitt gufubað, skellt sér í nuddpott og aðra heita potta sem þar er að finna á svæðinu. Þeir sem hafa hug á klettaklifri geta líka notið sín. Fari svo að mönnum verði handa- eða fótaskortur í klifrinu verður lendingin mjúk í volgri vatnstjörn sem er undir klifurstaðnum. Þá er að finna fimm vatnsrennibrautir á svæðinu. Ein þeirra liggur á leiksvæði barnanna. Þrjár brautanna eru nokkurs konar hraðrennibrautir þar sem brunfólkið sendist með ógnarhraða út í djúpa laug. Fimmta brautin er trampólínrennibraut sem samanstendur af víðu röri, hallandi trampólíni og vatnslaug. Þessi rennibraut virðist vera sú vinsælasta hjá eldri krökkunum.

Við hönnun útivistarsvæðisins var tekið með í reikninginn það gagnaðist sérstaklega börnum og barnafjölskyldum og foreldrar ættu auðvelt með að fylgjast með börnum sínum. Þá átti svæðið að endurspegla menningu og náttúru Vestmannaeyja.

Upphaflegar kostnaðar áætlanir gerðu ráð fyrir því að kostnaður við útivistar svæðið yrði 113 milljónir króna, en bankahrunið og gengisfall krónunnar setti strik í reikninginn og fer kostnaðurinn við gerð og hönnun að öllum líkindum upp í 270 milljónir króna þegar öll kurl verða komin til grafar.