Aida sviðsett

Aida – Ástarþríhyrningurinn fer á svið í Íslensku óperunni í kvöld kl. 20. Þetta eru sviðsettir tónleikar þar sem öll helstu ein- og samsöngsatriði óperunnar Aidu eftir Verdi verða flutt.

Aida er ein þekktasta ópera sögunnar, og var síðast sett upp í Íslensku óperunni árið 1987. Leikið er undir á píanó og byggir efnisskráin á ástarþríhyrningi aðalsöguhetjanna í óperunni.

Flytjendur eru stórsöngvararnir Elín Ósk Óskarsdóttir sópran og Jóhann Friðgeir Valdimarsson tenór ásamt Hörn Hrafnsdóttur messósópran. Undirleikari er Antonía Hevesi, píanóleikari við Íslensku óperuna. Miðaverð er 2.500 kr.