Urgur í bókaútgefendum

„Þessi listi er okkur mjög mikilvægur og það er mjög slæmt þegar vantraust myndast á hann,“ segir Pétur Már Ólafsson, útgefandi hjá Veröld. Eins og Fréttablaðið greindi frá í gær var hætt við að birta metsölulista bókaverslana sem Rannsóknarsetur verslunarinnar tekur saman. Ástæðan var sú að þau þrjú hundruð eintök af ævisögu Jónínu Ben sem Office 1 keypti og seldi í sínum verslunum í síðustu viku voru einnig inni í sölutölum N1.

Kristján Kristjánsson hjá bókaforlaginu Uppheimum var ekki hrifinn af áðurnefndum viðskiptagjörningi Office 1. „Það eru sérkennilegir viðskiptahættir að kaupa bók á fjögur þúsund krónur og selja á tvö þúsund.“ Kristján segist líka vera undrandi á því að allir dreifingaraðilar sitji ekki við sama borð. „Forlögin geta selt töluvert magn af hverri bók í sinni verslun. Þær tölur eru hins vegar ekki hafðar með inni í þessum lista.“

Egill Örn Jóhannsson, varaformaður Félags bókaútgefenda og framkvæmdastjóri Forlagsins, rifjar upp að fyrir fimm árum hafi staðið mikill styr um sambærilegan lista þegar matreiðslubækur Hagkaups plöntuðu sér í fimm efstu sætin. Þær voru þá eingöngu til sölu í þeim verslunum. Í kjölfarið var sett sú regla að listinn tæki eingöngu til þeirra bóka sem stæðu öðrum endursöluaðilum til boða. Egill er sjálfur ekki hrifinn af slíkum reglugerðum en vill að menn umgangist sölutölurnar og listann af virðingu, hann sé mikilvægt kynningar- og auglýsingatæki. „Listinn á að gefa sem bestu mynd af bóksölu á landinu og menn mega ekki misnota það tæki.“- fgg