Innbyrðis deilur sliga stjórn VR

Mikil ólga er í stjórn VR, stærsta stéttarfélags landsins, nú þegar póstkosning um stjórn og trúnaðarráð stendur fyrir dyrum. Tiltæki fjögurra stjórnarmanna úr samtökunum Nýju Íslandi, að skila á síðustu stundu inn mótframboði við áður samþykktan lista uppstillingarnefndar, hefur vakið hörð viðbrögð félaga þeirra í stjórninni.

Póstkosning um sjö sæti í fimmtán manna stjórn VR og 82 manna trúnaðarráð félagsins hefst í dag og mun standa í tvær vikur. Annars vegar verða þrír stjórnarmenn kosnir í einstaklingskosningu, og hins vegar fjórir stjórnarmenn og trúnaðarráðið í heild í listakosningu, en sá listi sem hlýtur meirihluta atkvæða nær allur kjöri.

Stillti upp lista og bauð fram annan

Fyrir áramót kaus trúnaðarráð VR uppstillingarnefnd til að raða áhugasömum niður á framboðslista og var sá listi samþykktur einróma á nýársfundi félagsins, án athugasemda, mótframboða eða breytingartillagna.

Rúmum tveimur mánuðum síðar, um miðjan febrúar, var hins vegar stofnað til nýs framboðs. Aðstandendur þess eru fjórir stjórnarmenn úr VR sem hafa sterk tengsl við samtökin Nýtt Ísland. Einn þeirra, Bjarki Steingrímsson, átti sæti í uppstillingarnefndinni sem lagði til fyrri framboðslistann og annar, Ragnar Þór Ingólfsson, tilnefndi fulltrúa í nefndina.

Þetta hefur farið illa í aðra stjórnarmenn, sem telja óeðlilegt að fjórmenningarnir – Bjarki, Ragnar, Guðrún Jóhanna Ólafsdóttir og Bergur Þór Steingrímsson – bjóði fram gegn lista sem sumir þeirra stóðu að. Þá hafa stjórnarmenn rætt það sín á milli að framboðið sé hugsanlega ólögmætt, vegna þess að það hafi þann eina tilgang að ná völdum í félaginu til þess að stuðla að óróa á vinnumarkaði, sundra samtöðunni og grafa undan hagsmunum félagsmanna.

Þá hefur stefna samtakanna Nýs Íslands einnig farið nokkuð fyrir brjóstið á öðrum stjórnarmönnum VR. Þeir lýsa stefnunni sem lýðskrumi og taka undir gagnrýni sem heyrst hefur á meinta alræðis-hyggju sem sjá megi í stefnuskrá samtakanna.

Nokkrir þeirra sem sæti áttu á fyrri trúnaðarráðslistanum höfðu hug á að færa sig um set yfir á nýja framboðslistann, en kjörnefnd tók fyrir það. Ekki væri hægt að breyta þegar samþykktum framboðslista. Eldarnir logað frá hruni

Mjög hefur verið tekist á í VR síðan eftir bankahrun. Rekja má átökin til óánægju með fyrrverandi formann félagsins, Gunnar Pál Pálsson, sem setið hafði í stjórn Kaupþings fyrir hrun og sem stjórnarmaður komið að ýmsum umdeildum ákvörðunum.

Gunnar fékk í kjölfarið tvö mótframboð til formanns. Annað kom frá Lúðvík Lúðvíkssyni, sem nú er einn talsmanna Nýs Íslands. Hann naut stuðnings þess fólks sem nú stendur að mótframboðinu til stjórnar. Það náði kjöri í stjórnina í fyrra undir merkjum L-listans, en Lúðvík, líkt og Gunnar Páll, laut í lægra haldi fyrir Kristni Erni Jóhannessyni, sitjandi formanni.

Síðan hefur ýmislegt gengið á. Ragnar Þór Ingólfsson, einn þeirra sem stendur að mótframboðinu umdeilda, birti í fyrrasumar á bloggsíðu sinni tölvupóstssamskipti svokallaðrar ‚skuggastjórnar‘, sem samanstóð af fyrrverandi stjórnarmönnum og samherjum Gunnars Páls. Sá hópur gat illa sætt sig við að nýliðarnir í L-listanum, sem nú kenna sig flestir við Nýtt Ísland, hefðu haft sigur í trúnaðarráðskjörinu, og mátti af póstsamskiptunum ráða að fólkið hygðist freista þess að ná undirtökum í félaginu á ný.

Í haust birtust svo upplýsingar í fjölmiðlum um notkun stjórnar-manna í VR á greiðslukortum félagsins og hefur L-listafólkið úr Nýja Íslandi verið sakað um að leka upplýsingunum til að koma höggi á aðra stjórnarmenn. Vilja ráðast gegn verðtryggingunni

Afnám verðtryggingar er eitt helsta stefnumál þess arms í VR sem spyrtur hefur verið við Nýtt Ísland. Sá hópur hefur í kjölfar yfirlýsingarinnar um mótframboðið verið ötull í gagnrýni sinni á linkind félagsins og stjórnarmanna þess í garð stjórnvalda og Alþýðusambandsins. Gagnrýnin hefur ekki síst beinst að tveimur fyrrverandi samherjum þeirra; Ágústi Guðbjartssyni og Ástu Rut Jónasdóttur, varaformanni VR. Bæði náðu þau kjöri með L-listanum en hafa síðan gengið af trúnni.

Gagnrýnin snýr meðal annars að því að þau, líkt og formaðurinn Kristinn Örn, hafi ekki viljað skrifa undir áskorun til stjórnvalda um afnám verðtryggingar, sem og því að Ágúst hafi látið af harðri andstöðu sinni við ASÍ eftir að honum var boðið sæti í miðstjórn sambandsins. Deilurnar lama stjórninaLangvinnur kryturinn hefur dregið mjög tennurnar úr starfi félagsins að sögn þeirra sem til þekkja. Þannig hafi stór hluti stjórnarfunda undanfarið ár mestmegnis gengið út á innbyrðis deilur. Eins og áður segir fæst botn í það eftir tvær vikur hverjir hafa betur í baráttunni.