Tíu konur á aldrinum 22 til 62 ára sitja naktar fyrir

„Þátttakan var mjög góð og ég fékk eiginlega of margar umsóknir," segir danski tískuljósmyndarinn Søren Rønholt.

Mikla athygli vakti á miðvikudag þegar Søren auglýsti eftir tíu íslenskum konum til að sitja naktar fyrir á heimilum sínum. Hann vinnur að bók um konur á Norðurlöndunum og ætlar að taka myndir af tíu dönskum, íslenskum, sænskum, finnskum og norskum konum. Søren er tískuljósmyndari í heimalandi sínu og hefur tekið myndir af mörgum af helstu stjörnum landsins.

„Fyrir nokkrum árum fór ég að velta fyrir mér hvað væri að staðalímyndunum í tískubransanum," segir Søren spurður um tilurð verkefnisins. „Myndvinnsla og notkun á Photoshop fór úr böndunum og ég vildi skoða hvernig líkamar kvenna á Norðurlöndunum líta út í raun og veru."

Ertu búinn að velja tíu íslenskar konur í verkefnið?

„Já, ég er búinn að velja konurnar. Það getur verið erfið vinna því þær eru að fara að sitja fyrir naktar og þekkja mig ekki neitt. Þannig að ég þarf auðvitað að ræða mikið við þær."

Á hvaða aldri eru þær?

„Konurnar eru á aldrinum 22 til 62 ára."

Søren segir að verkefnið sé ekki aðeins heimild um útlit kvenfólksins á Norðurlöndunum heldur einnig um heimili fólks og umhverfi. „Bókin verður heimild um tímana okkar," segir hann. „Myndirnar sýna hvernig við lítum út - hvernig danskar og íslenskar konur líta út á heimilum sínum árið 2010."

Engum myndvinnslubrögðum eða Photoshop-göldrum verður beitt til að fegra myndirnar, en Søren ítrekar þó að þær eigi að líta mjög vel út. „Myndirnar verða ofurnáttúrulegar," segir hann.

Settirðu konunum einhver líkamleg skilyrði?

„Nei, ekkert svoleiðis. Einu skilyrðin voru þau að konurnar væru 18 ára eða eldri og vildu taka þátt í verkefninu. Það er mjög mikilvægt."

Søren finnur fyrir miklum áhuga á verkefninu hér á landi og segir að það komi sér skemmtilega á óvart. „Ég vona að ég geti sýnt myndirnar á Íslandi þegar að því kemur og mun gera allt sem ég get til þess að það verði að veruleika," segir hann að lokum.

atlifannar@frettabladid.is