Spila í norskum morgunþætti

Hljómsveitin Hjaltalín kemur fram í norska morgunþættinum God morgen Norge á sjónvarpsstöðinni TV2 8. september. Þetta verður í annað sinn sem sveitin treður þar upp en síðast var hún gestur í þættinum fyrir tveimur árum.

„Það var mjög gaman. Þetta var rosa fyndið því þetta var svo brjálæðislega snemma morguns. Það var mæting fyrir allar aldir en það var bara allt í lagi,“ segir söngkonan Sigríður Thorlacius um síðustu heimsókn Hjaltalíns í þáttinn.

God morgen Norge er einn vinsælasti sjónvarpsþáttur Noregs og þykir svipa nokkuð til hins íslenska Kastljóss. Um afar góða kynningu er að ræða fyrir Hjaltalín sem er þessa dagana að kynna plötu sína, Terminal, erlendis. Hún ætlar að nýta ferðina til Noregs til tónleikahalds í Osló, Árhúsum og í Kaupmannahöfn þar sem lög af plötunni verða spiluð, þar á meðal Sweet Impressions sem nýlega kom út sem stafræn smáskífa.

Terminal hefur hlotið góða dóma á Norðurlöndum, rétt eins og annars staðar. Platan fékk 5 af 6 mögulegum í einkunn bæði í danska blaðinu Politikien og í Bergenavisen í Noregi. Hér heima var platan valin sú besta á síðasta ári af tónlistarspekúlöntum Fréttablaðsins.

-fb