Snjóblinda verður Snjóbrúður

„Schneebraut" er fyrirhugaður titill á nýrri bók Ragnars Jónassonar, Snjóblindu, sem gert er ráð fyrir að muni koma út í Þýskalandi á næsta ári. Bók Ragnars, sem er önnur skáldsagan sem hann gefur út, kom út í október og skömmu á eftir greindi Fréttablaðið frá því að til stæði að gefa hana út í Þýskalandi. Þýski titillinn myndi útleggjast Snjóbrúður á Íslandi. „Það þætti mér góður titill, enda hefst sagan á því að ung kona liggur blóðug í snjónum á Siglufirði, nær dauða en lífi," segir Ragnar.

Snjóblinda gerist að vetrarlagi á Siglufirði og er fyrsta spennusagan sem notar þann kunna síldarbæ sem sögusvið, enda á Ragnar ættir að rekja þangað. „Ég hef ekki tölu á því hversu oft ég hef heimsótt bæinn, en ég hef áreiðanlegar heimildir fyrir því - gestabók ömmu og afa - að þangað hafi ég fyrst komið þriggja mánaða gamall, og nú reyni ég að heimsækja bæinn nokkrum sinnum á ári," segir Ragnar.

Ragnar hafði þýtt skáldsögur Agöthu Christie um árabil áður en hann tók til við að semja glæpasögur, en hann viðurkennir þó að glæpasöguskrif hafi blundað í honum lengi. "Ég skrifaði raunar fyrstu glæpasöguna mína árið 1988, 12 ára gamall, en veit þó ekki hvort ég á hana til einhvers staðar lengur. Hún fjallaði um leynilögreglumennina James Morgan og Thomas Rickson og gerðist í London. Ég samdi líka nokkrar framhaldssögur um þá félaga sem ég á enn til í gömlum stílabókum heima og les þær kannski aftur einn góðan veðurdag."

Það er þýska risaforlagið Fischer sem á útgáfuréttinn á bókinni í Þýskalandi, en þeir hafa á sínum snærum glæpasagnahöfunda á borð við Agöthu Christie og Yrsu Sigurðardóttur. Á vefnum Sögueyjan Ísland má sjá að til stendur að bókin komi út hjá Scherz Verlag, einu undirforlaga Fischer, í október 2011, en þá verður Ísland einmitt heiðursgestur á bókamessunni í Frankfurt.