Sérsmíðaðar súlur fyrir Íslandsmótið í súlufitness

„Það eru tíu stelpur sem taka þátt. Þær eru búnar að æfa sig í sex mánuði og hafa lítið séð af fjölskyldunni," segir Inga Birna Dungal hjá X-Form en veglegt Íslandsmót í polefitness, þessari vinsælu íþróttagrein, verður haldið á skemmtistaðnum Replay við Grensásveg á laugardaginn.

Sigurlaunin eru ekki af verri endanum, þátttökuréttur á Evrópumótinu í polefitness sem fram fer í Bretlandi í næsta mánuði og hugsanlega einnig þátttökuréttur á heimsmeistaramótinu í Sviss. Að sögn Ingu hafa stúlkurnar tíu hannað og látið sérsauma á sig búninga þannig að keppnin verður ákaflega hörð þetta árið.

Inga segir að upphaflega hafi átt að halda mótið í nóvember á síðasta ári. En fallið hafi verið frá þeirri hugmynd til að gefa stúlkunum tækifæri til að æfa sig enn betur fyrir keppnina. Fyrirkomulagið er þannig að keppendur fá eitt atriði til að sýna listir sínar og það eru vissar reglur sem þær þurfa að fara eftir. „Það eru tvær súlur á sviðinu, ein föst og ein sem snýst. Þetta eru sérsmíðaðar súlur, fjórir metrar að lengd, og mér er það til efs að svona háar súlur hafi áður verið settar upp á Íslandi," útskýrir Inga en súlurnar eru byggðar samkvæmt alþjóðlegum stöðlum í polefitness.

Mikill áhugi hefur verið á pole-fitness hér á landi en þessi tegund af heilsurækt hefur slegið í gegn úti um allan heim. Í dag er hægt að læra þessi fræði á þremur stöðum, Magadanshúsinu, X-Formi og Heilsuakademíunni og koma keppendur frá öllum þessum stöðum. Inga Birna segir að til þess að alls hlutleysis sé gætt hafi hlutlausir dómarar verið fengnir til að skera úr um hver sé best. Formaður dómnefndar verður til að mynda fyrrum sendiherrafrúin Bryn-dís Schram en með henni í dómnefndinni sitja Egill Gillz Einarsson, Erpur Eyvindarson, Hannes Egilsson frá Íslenska dansflokknum, Heiðrún „fitness", Sigrún Lilja Guðjónsdóttir frá tískumerkinu Gyðju og fatahönnuðurinn Sara Forynja. Þá mun Haffi Haff vera kynnir keppninnar og mun hann frumflytja nýtt lag; The Dirty Side.

freyrgigja@frettabladid.is