Klovn-mynd er klámmynd

Klovn-myndin er að verða ein vinsælasta gamanmyndin í sögu Danmerkur og stjörnurnar tvær, Casper Christensen og Frank Hvam, mala gull. En nú hefur aðeins hægst á lukkuhjólinu því sumir vilja meina að myndin sé argasta klám.

Danskur barnabókahöfundur er æfur út í danska kvikmynda­eftirlitið vegna gamanmyndar­innar Klovn: The Movie sem byggir á samnefndum þáttum. Myndin er bönnuð börnum innan ellefu ára í Danmörku en það þykir barnabókahöfundinum ákaflega lágur aldur, hún ætti í raun að vera bönnuð innan sextán, þar sem hún sé mjög gróf.

Vibeke Manniche er barnalæknir og hefur skrifað bækur á borð við Allt um barnið og Heilbrigð börn sem notið hafa töluverðra vinsælda í Danmörku. Í samtali við danska dagblaðið BT segir hún að Klovn-myndin sé ekkert annað en klám og hún skilji ekkert í danska kvikmyndaeftirlitinu að hafa aldurstakmarkið aðeins ellefu ára. „Myndin er alltaf gróf fyrir börn á þessum aldri,“ segir Manniche. Fram kemur í umfjöllun B.T. að vissulega sé mikið af nekt í myndinni og margir vilja meina að hún fari á köflum yfir velsæmis­mörkin. Þannig sést trúðurinn Frank Hvam stinga fingri upp í endaþarm konu, Casper Christensen hefur mök við karlmann og þar að auki gera þeir tveir grín að tilla ellefu ára gamals drengs.

Vibeke segist óttast að myndin gæti haft alvarleg áhrif á hvernig börn upplifi sjálf sig og hvað sé eðlilegt. „Börn sem eru ellefu ára þekkja ekki muninn á skáldskap og raunveruleika. Myndin er mjög satírísk, sem gerir hana enn erfiðari í meltingu fyrir barn á þessum aldri,“ útskýrir Vibeke.

Framleiðandi Klovn-myndarinnar, Louise Vesth, segist ekki líta á Klovn sem klám og vísaði að öðru leyti í ákvörðun danska kvikmyndaeftirlitsins. Könnun á vef Ekstrablaðsins leiðir hins vegar í ljós að lesendur eru ekki sammála framleiðandanum, tæplega sextíu prósent telja að myndin ætti að vera bönnuð innan fimmtán ára.

Sambíóin dreifa Klovn-myndinni hér á Íslandi en hún verður frumsýnd 1. janúar. Þorvaldur Árnason hjá Sambíóunum segir að þeir séu ekki búnir að taka ákvörðun um hvaða aldurstakmark verði á myndinni. Á Íslandi er notast við svokallað hollenskt kerfi en það var tekið upp með lögum árið 2006. Kerfið á að vera nokkuð óbrigðult en Þorvaldur segir að þeir ætli að leita eftir upplýsingum um myndina og umræðum um hana í Danmörku. „Við eigum eftir að sjá myndina í heild sinni og tökum ákvörðun eftir það,“ segir hann. freyrgigja@frettabladid.is