Stóraukin netsala í Bretlandi

Á síðasta ári voru tekjur af sölu tónlistar á Netinu í Bretlandi í fyrsta sinn meiri en sem nam tekjulækkun af sölu á geisla- og mynddiskum í verslunum. Þetta er skýrt dæmi um þá þróun sem hefur átt sér stað víða um heim þar sem netsala hefur fært sig upp á skaftið á kostnað hefðbundinnar geisla- og mynddiskasölu.

Sala á tónlist á Netinu fór úr 12,8 milljónum punda í 30,4 milljónir á sama tíma og sala á geisla- og mynddiskum dróst saman um 8,7 milljónir. Alls voru keyptar 16,1 milljón hljómplatna á Netinu og hlaðið niður í Bretlandi árið 2009, sem er rúmlega 50 prósentum meira en árið á undan. Stefgjöld fyrir netsölu jukust um tæp 73 prósent og fóru í 30,4 milljónir punda.

Robert Ashcroft hjá PRS Music, sem eru samtök tónlistarmanna- og útgefenda í Bretlandi, er ánægður með þessa þróun. Hann vill þó ekki fullyrða að viðsnúningurinn sé kominn til að vera. „Samt sem áður bendir allt til þess að næsta áratuginn muni tekjur aukast á löglega stafræna markaðnum og einnig notkun á breskri tónlist í öðrum löndum," sagði Ashcroft.

Á síðasta ári gerðist það í fyrsta sinn í Bretlandi að stafrænar smáskífur seldust betur en hefðbundnar plötur. Rúmlega 150 milljónir smáskífna seldust á meðan plötusala féll úr 134 niður í 129 milljónir.