Abba í Frægðarhöllina

Sænska hljómsveitin Abba hlaut inngöngu í Frægðarhöll rokksins, eða Rock and Roll Hall of Fame, í gær. Breska hljómsveitin Genesis og The Hollies voru einnig tekin inn í höllina að þessu sinni.

Til að eiga möguleika á að komast í Frægðarhöllina þurfa hljómsveitir og aðrir tónlistarmenn að hafa gefið út sína fyrstu smáskífu eða plötu fyrir að minnsta kosti 25 árum.

Benny Andersson og Anni-Frid Lyngstad veittu viðurkenningunni móttöku við hátíðlega athöfn í New York en Björn Ulvaeus og Agnetha Fältskog sátu heima.

„Ég tala fyrir okkur öll þegar ég segi að við erum ákaflega þakklát fyrir þann mikla heiður sem okkur er sýndur," sagði Benny. Í þakkarræðu hans kom fram að Abba - sem gerði garðinn frægan á 8. áratug síðustu aldar með lögum á borð við Mamma Mia og Money, Money, Money - mun aldrei koma saman aftur á sviði.

Frægðarsól hljómsveitarinnar tók fyrst að skína fyrir alvöru þegar þau komu, sáu og sigruðu í Söngvakeppni evrópskra sjónvarpsstöðva árið 1974 með laginu Waterloo.