Vill að Lourdes sé íhaldssamari

Bandaríska söngkonan Madonna kastaði heldur betur steinum úr glerhúsi í nýju viðtali við US Weekly. Madonna hefur oft verið þekkt fyrir að klæðast fremur óhefðbundnum, eggjandi og efnislitlum klæðnaði en í umræddu viðtali sagðist hún vilja að dóttir sín, Lourdes, myndi klæða sig ögn íhaldsamar. „Hversu kaldhæðnislegt er það?,“ sagði Madonna og virtist gera sér grein fyrir því að þetta væri ekki eitthvað sem hún hefði efni á.

Madonna og Lourdes eru búnar að hanna saman fatalínu sem ber hið skemmtilega heiti Material Girl. Og mamman viðurkennir að hún sé ekki alltaf sátt við fatarvalið. „Hún fær sínar hugmyndir úr danstímum, frá Evrópu og hljómsveitum sem hún hlustar á. Hún mætir á tökustaði hjá mér og setur saman einhverja múnderingu. Og það er alveg sama hverjir eru að hanna fötin, hvort sem það er Marc Jakobs eða Stella McCartney, þau spyrja hana alltaf að því hvað henni finnst,“ útskýrir Madonna og augljóst að Lourdes hefur munninn fyrir neðan nefið þegar tíska er annars vegar.

Og Madonna upplýsir að þegar hún hafi hannað línu fyrir H&M þá hafi það í raun og veru verið Lourdes sem hafi unnið mestu vinnuna. „Ég kunni alveg ágætlega við starfið en þetta var ekki eitthvað sem mig langaði til að hella mér útí. Í raun og veru var það Lourdes sem gerði allt, hún er þrettán ára orkubolti og vildi alltaf vera að. Ég sat bara útí horni og lék mér í BlackBerry-símanum.“