Blanda af Björk og Spice Girls

Ellie Goulding er eitt heitasta nafnið í poppinu um þessar mundir. Dr. Gunni hlustaði á plötuna sem minnir á Emilíönu Torrini á köflum.

Söngkonan og lagahöfundurinn Ellie Goulding er rísandi nafn í enska poppheiminum. Uppganginn má skrifa á að hún var í efsta sæti á árlegum lista sem heitir BBC Sound of 2010. Gagnrýnendur og fólk í poppbransanum velur á þennan lista það tónlistarfólk sem þeir telja að muni slá í gegn á nýbyrjuðu ári. Það hefur verið mark takandi á þessum lista síðustu árin. Byrjað var að birta hann árið 2003 og þá var 50 Cent efstur á honum. Síðan tók við fólk eins og Mika og Little Boots og hljómsveitin Keane. Ellie vann einnig „Critics choice“-verðlaunin á síðustu Brit-hátíð.

Hætti í skóla fyrir poppiðEllie er fædd í Hereford á Englandi 30. desember 1986 og er því 23 ára. Hún lærði á gítar sem unglingur og var farin að semja þjóðlagaskotna tónlist fimmtán ára gömul. Hún fór í framhaldsskóla í Kent og kynntist Finlay Dow-Smith, sem kallar sig Starsmith, og hóf að vinna í tónlist með honum. Hann kynnti hana fyrir rafknúnu poppi og þau Ellie tóku til við að sameina þjóðlagatónlistina og rafknúið hljóðgervlaspilað vinsældapopp. Ellie hætti í skóla til að einbeita sér að poppinu þegar samningar náðust við Polydor-útgáfuna. Skömmu síðar fór maskínan í gang. Miklar væntingarFyrsta platan heitir Lights og kom út í byrjun árs. Við fyrstu hlustun virðist sem fólkið með puttann á púlsinum hafi eitthvað hlaupið á sig í ár því um ósköp hefðbundið popp er að ræða. Nokkur ágæt lög er að finna á plötunni en eins og margir gagnrýnendur hafa réttilega bent á er lítið byltingakennt og stórfenglegt við þessa frumraun. Einn gagnrýnandinn sagði að Lady Gaga hefði fleiri ferskar og athyglisverðar hugmyndir í vinstra brjóstinu en Ellie á allri plötunni. Hún er ágæt söngkona, minnir á Emilíönu Torrini á köflum, og er ágætur textahöfundur. Eðlilega eru gerðar miklar væntingar til söngkonunnar og hún fær því kannski harðari dóma en ella.

Sjálf segist Ellie hafa hlustað á Spice Girls sem barn en það hafi ekki verið fyrr en hún heyrði í Björk að hún vissi hvað hana langaði að gera þegar hún yrði stór. Með þessa vitneskju lýkst upp fyrir manni hljóðheimur tónlistarkonunnar, því það má segja án mikilli ýkja að Ellie hljómi á plötunni eins og hún sé stödd einhvers staðar mitt á milli Spice Girls og Bjarkar.