Spurningakeppni fjölmiðlanna í dag: Engin nördakeppni

Spurningakeppni fjölmiðlanna hefst klukkan fjögur í dag en alls tóku fjórtán lið þátt í þessari fornfrægu keppni sem áður var haldin í Ríkisútvarpinu. Nú er það Logi Bergmann sem bregður sér í hlutverk spyrilsins enda enn þá í fantaformi síðan hann hélt um stjórnartaumana í spurningaþættinum Gettu Betur.

„Þetta er mjög spennandi, þessi keppni er alltaf spennandi og keppnisskapið í sumum liðum er svakalegt," segir Logi sem samdi spurningarnar sjálfur fyrir keppnina. Hann segist einbeita sér að spurningum sem venjulegt fólk geti svarað.

„Þetta er ekki bara fyrir Gettu-Betur-nördana," segir Logi en hann spyr mikið um dægurlistir eins og kvikmyndir og tónlist og svo auðvitað fréttir.

„Svo reynir dálítið á menn í úrslitunum en þá fara spurningarnar að verða svolítið skrýtnar," segir Logi og útskýrir að þá reyni á það hversu athugulir menn eru.

Eins og fyrr segir þá hefst keppnin í dag klukkan fjögur. Næsti þáttur er á morgun, föstudaginn langa, klukkan fjögur. Svo eru úrslitin klukkan tvö á páskadag.