Íslendingar keppa í fullnægingu

Fimmtán myndir keppa í flokknum Fyrir opnu hafi á Alþjóðlegri kvikmyndahátíð í Reykjavík, RIFF, sem hefst 23. september. Ein myndanna er spænsk og nefnist Fake Orgasm og fjallar öðrum þræði um gervifullnægingar kvenna en í raun fjallar hún um kynjafræði og þróun sjálfsmyndar okkar. Í tengslum við sýningu myndarinnar verður efnt til keppni í gervifullnægingum á Næsta bar þar sem strákar og stúlkur munu etja kappi í þessari sérstöku íþróttagrein.

„Það er búið að tala við eitthvert fólk. Þetta verða bæði karlar og konur," segir Hrönn Marinósdóttir hjá RIFF. Hún segir að myndin Fake Orgasm hafi fallið misvel í kramið hjá fólki.

„Margir hreinlega ganga út en aðrir fíla hana í botn." Aðrar myndir í flokknum Fyrir opnu hafi fjalla um kynskiptinga, samfélagslegt hrun, undarlega finnska fjölskyldu, lífið í harðsvíruðu dönsku fangelsi og ýmislegt fleira.