Börn í leikskólum hafa aldrei verið fleiri

Í desember 2009 sóttu 18.699 börn leikskóla á Íslandi og hafa þau aldrei verið fleiri. Leikskólabörnum hefur fjölgað um 421 frá desember 2008 eða um 2,3%. Þessi fjölgun skýrist að hluta til af stærri árgöngum barna á leikskólaaldri auk þess sem sex nýir leikskólar tóku til starfa á árinu. Þetta kemur fram á vef Hagstofunnar.

Þá má greina breytingar á viðverutíma barnanna. Fram til ársins 2008 var stöðug aukning á fjölda barna sem dvöldu í leikskólanum í 9 klst. eða lengur. Í desember 2009 hefur þeim börnum fækkað um 230 börn og að sama skapi fjölgar börnum sem dvelja í sjö og átta tíma í leikskólum á hverjum degi.

Börnum með erlent móðurmál fjölgar

Börnum sem hafa annað móðurmál en íslensku hefur fjölgað ár frá ári frá því að gagnasöfnun Hagstofu Íslands um leikskóla hófst árið 1998. Haustið 2008 fækkaði þeim hins vegar í fyrsta sinn en fjölgar nú aftur haustið 2009 og hafa þau aldrei verið fleiri.

Nú eru 1.614 börn í leikskólum skráð með erlent móðurmál eða 8,6% barnanna. Af þeim eru 423 börn sem hafa pólsku sem móðurmál og er það fjölmennasta erlenda tungumálið eins og undanfarin ár. Þá fjölgar börnum með spænsku um 78% og er nú 71 barn í leikskólum sem hefur spænsku sem móðurmál en voru 40 fyrir ári síðan. Börnum sem hafa víetnömsku og ítölsku að móðurmáli fjölgar um helming milli ára.

Starfsmenn á leikskólum aldrei verið fleiri

Í desember 2009 störfuðu 5.596 starfsmenn í 4.813 stöðugildum við leikskóla á Íslandi og hafa leikskólastarfsmenn aldrei verið fleiri. Á vef Hagstofunnar kemur fram að árið 2008 störfuðu 5.568 starfsmenn í 4.761 stöðugildi við íslenska leikskóla. Starfsmönnum hefur fjölgað um 28 milli ára, sem er 0,5% fjölgun. Þetta er lítil fjölgun miðað við árið á undan þegar starfsfólki fjölgaði um 7,9%.

Líkt og áður segir jókst fjöldi leikskólabarna milli áranna 2008-2009 um 2,3% eða 427 börn. Starfsfólki fjölgar því minna en leikskólabörnum. Körlum sem starfa í leikskólum fækkar milli ára. Nú starfa 222 karlar í leikskólum en voru 240 fyrir ári síðan.