Noomi skilin og farin til Hollywood

Hjónaband sænsku leikkonunnar Noomi Rapace og eiginmanns hennar, Ola, er að enda komið. Noomi og Ola voru eitt helsta stjörnupar Svía en Noomi varð að stórstjörnu eftir túlkun sína á tölvuhakkaranum Lisbet Salander í Millennium-þríleik Stiegs Larsson. Parið hefur aldeilis náð að plata sænsku pressuna því ekki er lengra síðan en rúmar tvær vikur síðan sást til þeirra láta vel að hvort öðru á rauða dreglinum á kvikmyndahátíðinni í Feneyjum.

Það var Noomi Rapace sjálf sem skilaði inn pappírunum til dómara á föstudag, þó án undirskriftar makans. Sú tímasetning hefur eflaust verið vel skipulögð til að komast hjá ágangi fjölmiðla enda ljósvakamiðlar Svía búnir að vera undirlagðir af kosningunum sem fóru fram á sunnudaginn.

Ola og Noomi Rapace kynntust árið 2000, giftu sig árið 2001 og eiga saman einn son. Sambandið hefur verið einkar stormasamt og oftar en ekki hangið á bláþræði. Árið 2008 var Ola Rapace til að mynda handtekinn í bíl með ungri stelpu fyrir utan skemmtistað í Stokkhólmi með eiturlyf í fórum sínum. Í yfirheyrslum opnaði hann sig varðandi hjónabandsvandræðin og kenndi þeim um fíkn sína. Síðan þá virðist þó allt hafa leikið í lyndi og parið staðið saman í Lisbet Salander-ævintýrinu.

Noomi Rapace er að reyna koma sér á framfæri í Hollywood og er orðuð við hlutverk í kvikmyndinni Sherlock Holmes 2 en þar myndi hún leika við hlið stórstjarna á borð við Jude Law og Robert Downey Jr.