Sumar sandala og sverða

Þótt enn sé tæpur mánuður þangað til sumardagurinn fyrsti verður haldinn hátíðlegur í kulda og trekki eru menn þegar farnir að setja upp sólgleraugun og bíða eftir sumarsmellunum.

Poppvélar bíóhúsanna munu malla þegar sumarsmellir Hollywood skella á kvikmyndahúsum borgarinnar. Þótt ekkert Avatar-óveður sé í nánd eru þó nokkrar kvikmyndir sem gera tilkall til konungsdóms í miðasölu.

Barnahetjur

Börnin verða dugleg við að teyma foreldrana í bíó þetta sumarið því Pixar-fyrirtækið dustar rykið af tveimur þekktustu teiknimyndapersónum sögunnnar, Bósa Ljósár og Vidda kúreka. Að þessu sinni ákveður góðhjartaði eigandinn þeirra, Addi, að losa sig við æskuvinina og gefa þau á leikskóla. Sérlunduðu leikföngin sætta sig auðvitað ekki við að vera lamin og kreist á hverjum degi og undirbúa magnaðan flótta. Önnur og ógnvænlegri persóna undirbýr einnig endurkomu sína, sjálfur Skrekkur, en fjórða myndin um græna tröllið er sögð vera sú síðasta.

Hrói og Prinsinn

Eiginkonur ættu ekki að láta sér bregða þótt karlpeningurinn grafi upp gamla trésverðið og skjöldinn og fari að æfa gamla takta úti í garði, því sverð og sandalar eru meginþemað í sumar. Fyrsta ber að nefna Clash of Titans, endurgerð frá 1981, þar sem Avatar-stjarnan Sam Worthington leikur Perseus, Sam Neil Seif og Ralph Fiennes er Hades.

Þær tvær myndir sem margir spá að eigi eftir að berjast um hylli sverðelskandi áhorfenda eru hins vegar Robin Hood eftir Ridley Scott með Russell Crowe í hlutverki hjartgóða þjófsins og svo Prince of Persia með Gísla „okkar“ Garðarssyni í stóru hlutverki. Ef þær eru ekki meiri háttar klúður hala þær inn nokkrum krónum. Testesterón og stelpumyndir

En það er auðvitað ekki bara drepið með sverðum. Því sjálfur Iron Man mætir aftur til leiks með Robert Downey innanborðs. Heill her af stjörnum prýðir framhaldsmyndina en Mickey Rourke er skúrkurinn, Testesterónið fær síðan óheft flæði í kvikmyndum á borð við The Expandables þar sem Sylvester Stallone lætur ljós sitt skína og A-Team en hún er gerð eftir samnefndum sjónvarpsþáttum.

Kvenkynið lætur þetta yfir sig ganga gegn loforðum um að unnustinn bjóði þeim annaðhvort á Sex and the City 2 þar sem sjónvarpspersónurnar frægu glíma við fylgifiska einkalífsins eða The Twilight Saga: Eclipse þar sem skjáþokki Robert Pattinson bræðir unglingsstúlkur og siðvandar húsfreyjur. Vafalítið verður Knight and Date með þeim Tom Cruise og Cameron Diaz sú mynd sem pör og skötuhjú geta sanmælst um enda rómantísk hasarmynd fyrir bæði kyn.freyrgigja@frettabladid.is