Laug Lilju og Steinunnar vígð

Sundlaugin á Hofsósi sem athafnakonurnar Steinunn Jónsdóttir og Lilja Pálmadóttir gáfu íbúum staðarins 2007 verður vígð á laugardaginn.

Afrekskonan Ragnheiður Ragnarsdóttir tekur fyrsta sundsprettinn ásamt grunnskólabörnum en mikil spenna ríkir meðal íbúa Hofsóss fyrir því að geta loksins skellt sér í sund. Lilja Pálmadóttir kvaðst ánægð með að komið væri að þessum tímamótum en tæp þrjú ár eru liðin frá því að þær Steinunn og Lilja skrifuðu undir viljayfirlýsingu um verkefnið á kvenréttindadaginn 19. júní.

„Þetta er bara skemmtilegt og gaman að þetta skuli vera búið. Nú er bara að vona að fólk eigi eftir að njóta þess,“ segir Lilja.

Það var forsetafrúin Dorrit Moussaeiff sem tók fyrstu skóflustunguna að sundlauginni í apríl 2008 en verktakafyrirtækið Sveinbjörn Sigurðsson sá um að reisa sundlaugina sem er með útsýni yfir til Drangeyjar. Arkitektinn Sigríður Steinþórsdóttir teiknaði bygginguna en innifalið í gjöfinni var vegleg þjónustumiðstöð. Upphaflega stóð til að byggingu sundlaugarinnar yrði lokið fyrir jól á síðasta ári en vegna efnisskorts tafðist það aðeins.

„Ég held að krakkarnir hérna séu mest spenntir fyrir þessu og þetta verður alveg hryllilega skemmtilegt,“ segir Lilja.- fgg