Stórstjörnurnar vilja taka þátt í Glee-æðinu

GLEE, einn vinsælasti þátturinn í heiminum í dag, hefur göngu sína aftur í kvöld á Stöð 2. Nýju þættirnir verða að sjálfsögðu uppfullir af þekktum lögum og segir sagan að stærstu poppstjörnur heims sláist um að koma lögum sínum að enda slá þau undantekningarlaust í gegn og seljast í bílförmum, einkum á iTunes-vefnum.

Engin önnur en Madonna óskaði sérstaklega eftir að fá að tengjast þættinum og var þeirri beiðni hennar að sjálfsögðu tekið opnum örmum og mun Glee-hópurinn syngja hvorki fleiri né færri en 10 af vinsælustu lögum poppdrottningarinnar í þættinum í næstu viku. Ekki nóg með það heldur hefur poppprinsessan Lady GaGa einnig gefið leyfi fyrir því að hennar lög verði notuð í þáttunum.

Í þætti kvöldsins verða meðal annars sungin lög eftir Bítlana en það hefur aldrei gerst áður að svo margir þekktir tónlistarmenn leyfi notkun á lögum sínum. Ástæðan er einföld. Það eru allir að græða á tá og fingri því fátt selst betur hjá Itunes og öðrum tónlistarnetsölum en lögin úr Glee - og þeir sem mest græða á því eru höfundar laganna.

Þannig hafa liðsmenn hljómsveitarinnar Journey, sem sömdu og gerðu frægt lagið „Don't Stop Believin'" snemma á 9. áratugnum, látið hafa eftir sér að þeir hafi grætt margfalt meira á útgáfunni sem hljómaði í fyrsta Glee-þættinum heldur en þeir nokkru sinni gerðu á sinni eigin útgáfu.

Nú þegar hafa verið gefnar út þrjár plötur með lögunum úr Glee og þær hafa allar náð efsta sæti bandaríska sölulistans auk þess sem sala á iTunes á lögunum er komin vel á þriðju milljón. Þá átti Glee-hópurinn 25 lög á Billboard-lagalistanum sem er það mesta sem nokkur hefur afrekað á einu ári síðan Bítlarnir komu 31 lagi á sama vinsældarlista árið 1964.