Randver snýr aftur í Spaugstofuna

„Það voru miklir fagnaðarfundir á tökustað. Eins og við var að búast,“ segir Karl Ágúst Úlfsson, liðsmaður Spaugstofunnar, en Randver Þorláksson snýr aftur í Spaugstofuna í kvöld þegar hann endurtekur eitt af frægustu hlutverkum þessa spéspegils, rónann Örvar. Randver var sem kunnugt er látinn fara þegar Spaugstofan var á RÚV en hinir fjórir, Karl, Sigurður Sigurjónsson, Pálmi Gestsson og Örn Árnason héldu áfram.

Randver hefur ekki birst í neinum gestahlutverkum fyrr en nú og því er um sögulegan viðburð að ræða. „Hann birtist í einum skets, sem er í svona tvær til þrjár mínútur. Okkur fannst kominn tími á að Bogi og Örvar myndu hittast aftur og okkur gafst tækifæri til þess nú.“ Spaugstofan hefur bryddað upp á þeirri nýbreytni að bjóða landsþekktum Íslendingum í þáttinn og hefur Jónínu Benediktsdóttur, Loga Bergmanni og fleirum brugðið fyrir sem þeim sjálfum. Karl segir hins vegar að nærvera Randvers hafi fyllt stjörnukvóta þáttarins.

Randver sjálfur vildi gera sem minnst úr aðkomu sinni að þættinum. Og bætir því við að hann hafi ekki séð Spaugstofuna né Stöð 2 í nokkur ár. Hann hafi því ekki enn séð gömlu samstarfsfélagana í nýjum búningum. Sjálfur fékk Randver reyndar nýjan búning fyrir Örvar, rónavin sinn, enda urðu allir leikmunir eftir á gamla vinnustaðnum í Efstaleiti. Randver segist hafa tekið ágætlega í bón vina sinna en biður þó fólk um að gera sér ekki of miklar væntingar, hann sé í mýflugumynd og eigi erfitt með ímynda sér að þetta sé eitthvað sem þjóðin hafi beðið eftir. - fgg