Bigelow með nýja mynd

Kathryn Bigelow, sem fékk Óskarinn í fyrra fyrir The Hurt Locker, er búin að fá Tom Hanks til að leika í stórmyndinni Triple Frontier. Og Karl Júlíusson til að hanna leikmyndina eins og Fréttablaðið hefur þegar greint frá.

Hún er hins vegar ekki alveg sannfærð um að það verði hennar næsta verkefni þrátt fyrir að tökur eigi að hefjast um mitt ár 2011 því hana klæjar í fingurna að byrja á nýrri mynd og hefur, samkvæmt Empire Online, sannfært framleiðandann Mark Boal um að þau geti vel gert mynd í millitíðinni.

Ekki er hins vegar vitað hvaða mynd verður fyrir valinu því bæði Boal og Bigelow eru þögul sem gröfin. Samkvæmt kvikmyndabiblíunni Variety verður hún gerð fyrir álíka upphæð og The Hurt Locker, eða tíu milljón dali, og á að fjalla um einhvers konar frelsishetjur. Og þegar Bigelow er spurð af hverju hún vilji endilega gera mynd þegar það styttist í tökudag á Triple Frontier var svarið einfalt: „Ég get einfaldlega ekki beðið eftir því.“