Hamskiptin til San Fransisco

„Þeir keyptu bara handritið. Eru þetta einhverjir peningar? Maður fær náttúrulega höfundarlaun en þetta veltur allt á því hvað verkið er sýnt lengi,“ segir Gísli Örn Garðarsson en Aurora-leikhúsið í San Fransisco hefur keypt leikgerð hans og Davids Farr að verki Kafka, Hamskiptunum, sem leikhópurinn Vesturport hefur sýnt út um allan heim. Gísli segist lítið vita um leikhúsið en skilst að það sé hluti af hinum óháða geira í bandaríska leikhúsheiminum.

Og leikstjórinn og leikarinn segist ekki hafa hugmynd um hvernig leikhúsið komst yfir þessa leikgerð. „Þeir voru búnir að liggja yfir einhverjum útgáfum af þessu verki og völdu okkur,“ segir Gísli en hann kemur ekkert nálægt þessari uppsetningu heldur mun leikhúsið bara notast við sína eigin leikstjóra og leikara.

Gísli er nýkominn heim frá kólumbísku borginni Bogota þar sem Vesturport sýndi einmitt Hamskiptin á einni stærstu leikhússýningu heims. „Þetta var mjög sérstök lífsreynsla, þarna gengu miðar kaupum og sölum á svörtum markaði, lögreglumenn með vélbyssur á hverju götuhorni og sprengjuleit fyrir hverja sýningu. En það gekk allt rosalega vel hjá okkur og það var fullt á öllum sýningunum sex,“ segir Gísli og hrósaði þeim Víkingi Kristjánssyni og Selmu Björnsdóttur alveg sérstaklega en þau léku í þessari sýningu í fyrsta skipti. „Það mæddi mikið á þeim en þau stóðu sig alveg eins og hetjur.“- fgg