Harry Redknapp segir að Eiður Smári hafi valið Tottenham

Harry Redknapp, stjóri Tottenham, er nokkuð viss um að Eiður Smári Guðjohnsen muni spila með liðinu út tímabilið ef marka má viðtal við hann í The Sun.

„Við höfum verið að ræða um hann í tvær vikur og þegar við heyrðum að West Ham hefði áhuga á honum þá settum við okkur í samband við hann," sagði Harry Redknapp við The Sun.

„Við erum ekki að borga krónu meira en það sem West Ham var að bjóða honum. Báðir samningarnir eru eins og á endanum snérist þetta aðeins um það hvað Eiður vildi gera sjálfur," sagði Redknapp.

Samkvæmt frétt The Sun þá mun Tottenham borga Eiði Smára 30 þúsund pund á viku en Mónakó mun síðan borga það sem vantar upp á samkvæmt samningi Eiðs við franska félagið.

Eiður Smári mun síðan væntanlega skrifa undir samninginn þegar hann hefur farið í gegnum læknisskoðun í dag.