Austin kemur aftur

Einkabarn kanadíska grínistans Mike Myers, Austin Powers, snýr aftur á hvíta tjaldið. Leikstjórinn Jay Roach hefur skrifað undir samning um að leikstýra fjórðu myndinni en væntanlega vita fáir hvort þeir eiga að gráta eða gleðjast yfir þeim tíðindum. Myers hefur undanfarin ár misst „mojo-ið“ sitt ef undanskilið er lítið hlutverk í Inglorious Basterds.

Verne Troyer hvatti Mike nýlega til að hraða skrifum sínum því hann gæti ekki beðið eftir því að byrja á fjórðu myndinni. Roach sagði síðan við fjölmiðla að Myers væri byrjaður að skrifa, allir væru ákaflega spenntir fyrir myndinni og að númer fjögur myndi fara í ferðalag á það framandi slóðir að þær ættu eftir að koma öllum í opna skjöldu. Nú er bara að vona að Myers finni brandara-andann aftur.