Tangómaraþon um helgina

Kunnáttumenn í tangódansi mæta um helgina áskorun: Tangófélagið efnir til veglegs tangómaraþons til styrktar átaki Krabbameinsfélags Íslands, Karlmenn og krabbamein: Mottumars í Iðnó og Ráðhúsi Reykjavíkur. Koma hingað plötusnúðar frá Svíþjóð, Danmörku og Íslandi og er því ljóst að tónlistin ætti að vera bæði fjölbreytt og skemmtileg.

„Dagskráin stendur frá kl 20.00 á föstudegi til kl. 18.00 á sunnudaginn,“ segir Hany Hadaya sem er einn af forgöngumönnum þessa dansátaks:

„Á laugardaginn verður dansað frá hádegi til sjö en þá verður haldið í sameiginlegan kvöldverð á veitingahúsinu Pisa. Síðan höldum við áfram að dansa frá 20.30 til 05.00. Á sunnudaginn færum við okkur yfir í Ráðhúsið og dönsum frá hádegi til klukkan 18.00 þegar maraþoninu líkur.“ Hany bætir við að ekki muni væsa um gesti því boðið verður upp á te, kaffi, vatn og ávexti á meðan á maraþoni stendur.

Í næstu viku verður önnur samkoma helguð tangónum: Hinn 24. mars verður í Salnum í Kópavogi tangókvöld helgað finnskum og íslenskum tangóum. Hópurinn Fimm í Tangó lagði upp með finnska tangóa í nóvember 2007, útsetta af Haraldi Vigni Sveinbjörnssyni og Tatu Kantomaa, og hefur hópurinn haldið fimm tónleika síðan sem hafa verið undirlagðir tangótónlist.

Frumsamdir íslenskir tangóar hafa ratað til hópsins frá upphafi: Allir íslensku tangóarnir eru sérstaklega samdir fyrir Fimm í Tangó og hefur Haraldur Vignir þegar samið þrjá tangóa fyrir hópinn. Fleiri tónskáld hafa bæst við og mun hljómsveitin Fimm í Tangó frumflytja tangó eftir Hafdísi Bjarnadóttur. Hópinn skipa nú Ágúst Ólafsson, söngur, Ástríður A. Sigurðardóttir, píanó, Íris Dögg Gísladóttir, fiðla, Kristín Lárusdóttir, selló, og Matti Kallio, harmónika.

Tangóunnendur og státnir dansmenn, karlar og konur, hafa því nóg að gera næstu viku. - pbb