Evrópumálin grundvöllur endurreisnarinnar

„Ég dreg enga dul á að ég lít á Evrópumálin sem grundvöll í endurreisn Íslands. Það hefur aldrei verið ríkari ástæða en einmitt nú til að láta reyna á hvað falist getur í aðildarsamningi," sagði Össur Skarphéðinsson, utanríkisráðherra, þegar hann flutti skýrslu um utanríkis- og alþjóðamál á Alþingi í dag.

Hann sagði að það væri mikilvægt að hafa umsóknarferlið eins opið og gagnsætt og hægt væri ekki síst til að eyða tortryggni og misskilningi. Málið væri vissulega umdeilt en um skipan aðalsamningamanns, samninganefndarinnar sjálfrar og samningahópanna tíu ríkti góð sátt, ekki síst við hagsmunasamtök.

Þá sagðist Össur telja að hægt væri að tryggja bæði hagsmuni sjávarútvegs og landbúnaðar í aðildarviðræðunum. „Íslenskur sjávarútvegur er í fremstu röð. Samkvæmt reglum Evrópusambandsins á ekkert aðildarríkja tilkall til veiðiheimilda í íslenskri lögsögu. Í áliti framkvæmdastjórnarinnar kemur líka skýrt fram, að ESB gerir ráð fyrir, að aðild Íslands, hefði þýðingarmikil áhrif á sameiginlegu sjávarútvegsstefnuna. Það gefur tilefni til bjartsýni, því sú staðhæfing felur í sér yfirlýsingu um, að það sé fullt tilefni fyrir ESB að taka tillit til okkar stefnu um fiskveiðar."

Össur sagði að í þessu ljósi og ekki síður vegna viðræðna hans við forystumenn helstu sjávarútvegsþjóða ESB telji hann sterk rök standa til þess að Íslendingar geti haldið sínu í sjávarútvegsmálum innan Evrópusambandsins.

„Við vitum að Finnar náðu sérstökum heimildum fyrir sinn landbúnað, og stuðningur við íslenska bændur rúmast innan þess ramma sem norðurslóðastuðningur í Finnlandi leyfir. Á reynslu Finna getum við byggt rök fyrir heimildum sem ganga enn lengra - ef við viljum."