Ársverkunum hefur fækkað um tíu þúsund

Fækkað hefur um nálega tíu þúsund ársverk í mannvirkjagerð frá þriðja ársfjórðungi ársins 2008 til fyrsta ársfjórðungs 2010. Viðlíka samdráttur hefur ekki orðið í neinni annarri grein frá hruni. Efnahags- og viðskiptaráðherra hefur svarað fyrirspurn Birgis Ármannssonar, Sjálfstæðisflokki, um samanburð á ársverkum sundurliðað eftir atvinnugreinum. Í því kemur fram að í byrjun þessa árs voru 10.500 ársverk í mannvirkjagerð á móti 20 þúsund ársverkum upp úr miðju ári 2008.

Á skoðunartímabilinu hefur ársverkum fækkað um tíu þúsund, farið úr 173.900 á fyrsta ársfjórðungi 2008 í 163.900 á fyrsta ársfjórðungi 2010. Flest voru ársverkin á þessu tímabili á þriðja ársfjórðungi 2008, 183.800.

Ársverkum hefur fjölgað í nokkrum greinum og sýnu mest í flokknum hótel og veitingahús. Ársverkin voru sex þúsund á fyrsta fjórðungi 2008 en átta þúsund í ár. Fjölgað hefur í fræðslustarfsemi um 1.600 ársverk, opinberri stjórnsýslu um 300, fiskiðnaði um 400, veiðum um 300 og landbúnaði um 300 ársverk.

Auk mannvirkjagerðar hefur fækkað í flokknum öðrum iðnaði, verslun og viðgerðum, fasteignaviðskiptum og ýmissi þjónustu og fjármálaþjónustu. Fækkunin í fjármálaþjónustu nemur 1.900 ársverkum.bjorn@frettabladid.is