Dóttirin í forgang

Leikkonan Jessica Alba vill ekki yfirgefa dóttur sína, Honor Marie, til að leika í kvikmynd nema hún sé handviss um að myndin verði góð. Alba á hina tveggja ára dóttur með eiginmanni sínum Cash Warren.

„Tíminn sem ég er ekki með dóttur minni þarf að vera þess virði. Þess vegna sagði ég við umboðsmenn mína eftir að ég byrjaði aftur að leika: Þetta snýst allt um góðan leikstjóra,“ sagði Alba. Næst leikur hún í gamanmyndinni Little Fockers á móti Ben Stiller og Robert De Niro. „Ég er feimin. Ég vil ekki vera miðpunktur athyglinnar. En þegar ég leik í gamanmyndum losa ég um allar hömlur og mér verður alveg sama.“

Hin 29 ára Alba segist jafnframt eiga auðveldara með að taka gagnrýni eftir því sem hún eldist. „Ég var alltaf mjög hrædd við gagnrýni. Alltaf þegar ég var gagnrýnd tók ég því mjög persónulega en núna finnst mér þetta ekkert vandamál.“

Nýjasta mynd Alba er hasarmyndin blóðuga, Machete, þar sem leikstjórinn er Robert Rodriguez, sami maður og leikstýrði henni í Sin City.