Vonar að Lil Wayne spjari sig

Bill Clinton, fyrrverandi Bandaríkjaforseti, hefur tjáð sig um rapparann Lil Wayne, sem verður látinn laus úr fangelsi í dag. „Dóttir mín kynnti mig fyrir rappi og hip hop tónlist eftir að ég sagði hluti sem þóttu ekki töff,“ sagði Clinton á bandarísku útvarpsstöðinni Kiss FM.

„Hún sagði: „Pabbi, þú verður að hlusta. Allt þetta fólk er klárt í kollinum.“ Þessi náungi er klár í kollinum. Hann er hæfileikaríkur og hann fær nýtt tækifæri núna. Ég vona að þetta verði ekki til þess að hann verði talinn svalari en áður. Frekar að þetta verði til þess að þetta komi aldrei fyrir hann aftur,“ sagði Clinton.

„Margt af þessu fólki nær ekki langt í lífinu, rétt eins og annað fólk, með því að vera heimskt. Þetta fólk er virkilega snjallt. Margir úr þessum hópi hafa átt erfiða ævi og það liggur við að þeim finnist svalt að lenda í vandræðum stöku sinnum. Ég vona bara að líf hans verði gott í framhaldinu.“