Star herjar á Ashton

Bandaríska tímaritið Star er ekki af baki dottið þótt leikarinn Ashton Kutcher hafi hótað því öllu illu eftir síðustu frétt blaðsins sem snerist um meint framhjáhald hans. Kutcher er kvæntur Demi Moore en þau eiga fimm ára brúðkaupsafmæli á næstunni. Í gær birti blaðið textaskilaboð frá Kutcher sem hin 21 árs gamla Brittany Jones fékk frá honum en Kutcher og Jones eiga að hafa átt nokkrar innilegar stundir á heimili Hollywood-hjónanna.

People-tímaritið hefur eftir heimildarmanni sínum að þessar fréttir virðist hins vegar lítið bíta á hjónin. „Þau virðast allavega halda sínum vandamálum fyrir sig,“ segir heimildarmaðurinn en Kutcher ku hafa heimsótt frúna á tökustað nýjustu myndar hennar og þar virtust skjötuhjúin svífa um á bleiku skýi.

Kutcher hefur hótað Star málsókn en það verður fróðlegt að sjá hvort þetta nýjasta útspil tímaritsins verði til þess að einhverjar ormagryfjur opnist. Radaronline.com heldur því reyndar fram að meintur hjónadjöfullinn hafi verið með Kutcher á heilanum í dágóðan tíma.