André Bachmann lagður inn á sjúkrahús

„Hann vaknaði um daginn með þvílíka magapínu sem endaði með því að hann var lagður inn," segir Jóhannes Bachmann, bróðir André Bachmann sem hefur skipulagt jólaball fatlaðra undanfarin ár.

Jólaballið verður haldið á Hilton-hótelinu á miðvikudaginn og heiðursgestir verða forsetahjónin, eins og komið hefur fram í Fréttablaðinu. Jói sér um skipulagninguna í fjarveru bróður síns og eins og staðan er í dag treystir André sér ekki til að mæta. „Ég er búinn að vera með honum í þessu í gegnum árin og þekki þetta allt saman mjög vel. Ég sagði honum að það væri langt í samkvæmið og hann skyldi bara hafa sig hægan og góðan," segir Jói sem telur veikindin ekki alvarleg og vonast til að sjá bróður sinn á ballinu þrátt fyrir allt. „Ég sagði við hann að hann ætti ekkert bágt við hliðina á þessu fólki. Ef hann kemur gerir hann það sem ég skipa honum, að sitja á rassinum og njóta kvöldsins. Þá myndi þetta vera í fyrsta sinn sem hann myndi fá að njóta samveru með fólkinu í staðinn fyrir að vera á bak við og reka á eftir skemmtikröftunum og skipuleggja."

Jói segir viðbrögðin við þessu 28. jólaballi hafa verið sérlega góð en á meðal þeirra sem troða upp verða Bubbi, The Charlies og Ingó Veðurguð. „Við höfum talað um það bræðurnir að við ætlum að halda þetta út í þrjátíu ár. Svo sjáum við til hvort við tökum önnur tíu," segir hann og hlær. - fb