Leitað að 12 til 14 ára kvikmyndaleikara

Eftir tæpar þrjár vikur hefjast tökur á gamanmyndinni Okkar eigin Osló í leikstjórn Reynis Lyngdal. Framleiðendur leita því logandi ljósi að 12 til 14 ára dreng sem á að leika son Brynhildar Guðjónsdóttur og Hilmis Snæs Guðnasonar í myndinni.

Þeir sem hafa áhuga geta sent upplýsingar um reynslu í leiklist, nýlega ljósmynd og símanúmer forráðamanna á tölvupóstinn sara@ljosband.is.

Myndin gerist í Osló, í sumarhúsahverfi við Þingvallavatn og í Reykjavík. Þorsteinn Guðmundsson skrifaði handritið og leikur jafnframt aðalhlutverkið, Harald. Hann er verkfræðingur hjá Marel sem kynnist Vilborgu, sem er nýbúin að missa vinnuna í bankanum vegna slakrar frammistöðu.

Húmorinn í myndinni er sagður galsafenginn en stefnt er að því að frumsýna hana í febrúar. Framleiðendur myndarinnar eru þær Hrönn Kristinsdóttir og Anna María Karlsdóttir.