Unglingastjarnan Corey Haim er látinn

Ein skærasta unglingastjarnan í Hollywood á níunda áratug síðustu aldar, Corey Haim, lést í morgun 38 ára að aldri. Að sögn lögreglunnar í Los Angeles er talið líklegast að ofneysla eiturlyfja hafi riðið honum að fullu.

Corey Haim er þekktastur fyrir samstarf sitt við nafna sinn, Corey Feldman, en saman léku þeir í vampíuklassíkinni The Lost Boys, Licence to Drive og Dream a Little Dream.

Hvorugur þeirra náði þó að viðhalda frægðinni af neinu viti og hefur lítið sést til þeirra síðustu árin. Þeir reyndu þó að endurræsa ferla sína með raunveruleikaþáttunum The Two Coreys, án árangurs.

Feldman hefur ekkert tjáð sig um sviplegt fráfall nafna síns og vinar.