Krefst skaðabóta

Lagahöfundurinn og upptökustjórinn Rob Fusari, hefur höfðað skaðabótamál gegn söngkonunni Lady Gaga. Hann segist hafa samið með henni vinsæl lög og tryggt henni plötusamning, án þess að hafa fengið nokkuð fyrir sinn snúð. Hann krefst 30,5 milljóna dollara í bætur, eða hátt í fjögurra milljarða króna.

Fusari er fyrrverandi kærasti Gaga og segir að hún hafi látið sig flakka um leið og vinsældirnar bönkuðu á dyrnar. Hann segist fyrst hafa hitt Gaga þegar hún kom fram undir eigin nafni, Stefani Germanotta, árið 2006.

Hann segist hafa á næstu mánuðum breytt henni í Lady Gaga og komið ferli hennar af stað. Hann mun hafa tryggt henni plötusamning við fyrirtækið Inter­­scope Records, sem gaf út plötu hennar The Fame, árið 2008. Hún hefur selst í yfir þremur milljónum eintaka í Bandaríkjunum. Í janúar fékk Gaga tvenn Grammy-verðlaun fyrir plötuna.