Andspyrna á Laugardalsvelli

„Við fengum ósk um vináttulandsleik frá Hollendingum og viljum gjarnan að hann fari fram á Laugardalsvellinum. Enda kominn tími til að karlalandslið fari nú að vinna eitthvað á þessum velli," segir Friðgeir Torfi Ásgeirsson, forseti Andspyrnusambands Íslands.

Friðgeir hefur rætt við vallarstjóra Laugardalsvallarins sem tók ágætlega í málið og það er nú í réttum farvegi. Ekki liggur fyrir hvenær leikurinn við Hollendinga verður en stefnt er að því að hann verði fyrir Evrópumeistaramótið í áströlskum fótbolta sem fram fer í Kaupmannahöfn og Malmö í sumar.

Þegar Friðgeir er krafinn skýringa á nafni sambandsins, Andspyrna, stendur ekki á útskýringum. „Okkur fannst nafnið „ástralskur fótbolti" vera nokkuð óþjált og höfum því verið að leita eftir nýju íslensku orði. Andspyrna er samsett úr orðinu „andfætlingur", sem er annað heiti yfir Ástrali, og svo knattspyrnu," útskýrir Friðgeir en á næstunni verður opnuð heimasíðan andspyrna.is.

Eins og Fréttablaðið hefur greint frá stundar hópur íslenskra pilta þessa harðskeyttu íþrótt og ætla piltarnir nú að færa út kvíarnar.

„Við ætlum að setja á fót deild þriggja liða til að byrja með og svo verður opinn kynningardagur 2. maí þar sem við kynnum íþróttina á Austurvelli, leyfum fólki að sparka í bolta og sjá sportið með berum augum," segir Friðgeir en fyrir áhugasama má benda á að æfingar eru í Fífunni í Kópavogi klukkan níu á sunnudagskvöldum.

- fgg