Barnabókahöfundur náði mynd af Lagarfljótsorminum

Barnabókahöfundurinn Huginn Þór Grétarsson ætlar sennilega að verða afkastamesti rithöfundurinn í ár en hann hefur gefið út fjórar barnabækur. Þar af var ein bókin prentuð í tíu þúsund eintökum.

Þá náði Huginn mynd af því sem gæti verið Lagarfljótsormurinn.

„Ég gef þær bækur út í samstarfi við American Style," segir Huginn en börn sem fara þangað að borða geta fengið bækurnar gefins.

Aðspurður hvort hann sé þá orðið nokkurskonar hamborgaraskáld hlær Huginn og svarar því til að það sé margt reynt til þess að vekja athygli á sér.

„Það var nú einhverntímann Bónusljóðskáld ekki satt?" spyr Huginn og bætir við: „Nei annars er málið að þegar maður er að byrja í þessu þá eru margar lokaðar dyr. Maður þarf því stundum að vera dálítið skapandi í framsetningunni."

Yrkisefni Hugins eru af öllum toga. Hann segist til að mynda hafa skrifað um hrunið á Íslandi, en með sínu nefi. Þannig varð bókin „Kanínan sem fékk aldrei nóg" til.

„Sú saga segir af einstaklega gráðugri kanínu sem safnar endalaust af grænmeti þar til hlass af kartöflum endar þá sögu með táknrænum hætti," segir Huginn um söguþráð bókarinnar.

Ein af bókunum sem Huginnn skrifar í ár er ævintýrabók um Lagarfljótsorminn. Þá vekur athygli að með bókinni fylgir ljósmynd sem Huginn tók sjálfur árið 2008.

Í bakgrunni ljósmyndarinnar má sjá eitthvað sem líkist risastórri skepnu í Lagarfljótinu. Aðspurður hvort hann telji sig hafa náð að mynda orminn svarar Huginn:

„Ég veit það ekki. Þetta gæti allt eins verið eitthvað drasl." Myndin talar þó sínu máli og hún er sannarlega sérkennileg. Hana má nálgast í bókinni Lagarfljótsormurinn.

Huginn segist sækja efniviðinn og andagiftina í norrænu barnahöfundana H.C. Andersen og Astrid Lindgren. Hann segist sérstaklega hrifinn af gömlu ævintýrunum.

Sjálfur hefur Huginn verið ótrúlega afkastamikill síðustu þrjú ár en alls hefur hann gefið út 12 bækur og selt þær í þúsundum eintaka.

Auk þess að skrifa allar bækurnar gefur hann þær allar sjálfur út undir formerkjum Óðinsauga. Teikningarnar eru eftir ýmsa listamenn, bæði íslenska sem og erlenda.