Akureyrarflugvöllur líka úr leik

Fullt var út úr dyrum í gær í flugstöðinni á Akureyrarflugvelli sem þjónaði sem miðstöð millilandaflugs Íslendinga. Breyttar vindáttir lokuðu þó flugvellinum um miðnæturbil.

„Maður vildi svo sem gjarnan hafa traffíkina af öðrum ástæðum en þeim sem við stöndum frammi fyrir,“ sagði Sigurður Hermannsson, umdæmisstjóri Flugstoða á Akureyrarflugvelli, síðdegis í gær.

Vegna lokunar flugvallarins í Keflavík og Reykjavíkurflugvallar var í gær öllu millilandaflugi beint til Akureyrar. Farþegum sem koma þurfti til og frá höfuðborgarsvæðinu var ekið á milli í rútum. Fullt var út úr dyrum í flugstöðinni þegar rúturnar komu með farþega til brottfarar. Samkvæmt fréttum Ríkissjónvarpsins komu upp tilvik þar sem farþegar fóru norður en komust ekki í tilætlað flug því ekki hafði verið gert ráð fyrir þeim. Flogið var með farþega til og frá Glasgow og til Berlínar og Kaupmannahafnar. Um klukkan sex í gær höfðu tólf vélar í millilandaflugi lent á Akureyri og tíu tekið á loft.

Nýjasta spá um öskufall gerði ráð fyrir að vindur myndi beina ösku yfir Eyjafjörð um miðnætti í gær og loka þar með fyrir millilandaflug á Akureyri. Spáin fól sömuleiðis í sér að flugvellirnir fyrir sunnan verða lokaðir áfram. Að sögn Hjördísar Guðmundsdóttur, upplýsingafulltrúa Flugstoða, virtist sem hægt yrði að halda Egilsstaðaflugvelli opnum fyrir millilandaflug. Óljóst var í gærkvöld hvernig flugfélögin myndu bregðast við þessu ástandi.

Staðan sem upp kom í gær var ekki óvænt. „Vissulega voru menn farnir að hugsa um þetta og farnir að gera sér grein fyrir því að þetta væri hlutur sem gæti gerst hvenær sem væri. Þannig að menn voru búnir að undirbúa sig,“ sagði Sigurður sem kvað allt hafa gengið nokkurn veginn í samræmi við áætlanir í gær. „Það tekur alltaf tíma, þegar þetta umfangsmikil aðgerð er að fara í gang, að slípa einhverja agnúa af en heilt yfir held ég að þetta hafi gengið vel.“

Mannskap var bætt við í flest störf á Akureyrarflugvelli í gær. Sigurður segir að þótt álagið sé margfalt á við það sem venjan er sé öryggisleit og tollskoðun sambærileg við það sem tíðkast á Keflavíkurflugvelli.

Sigurður segir Norðlendinga búna undir framhald. „En það er náttúrulega algjörlega háð veðri og vindum,“ segir hann.

Magnús Tumi Guðmundsson jarðeðlisfræðingur sagði í gær að mesti krafturinn væri nú úr gosinu í Eyjafjallajökli. „Við metum stærðargráðuna núna þannig það séu að koma tuttugu til þrjátíu tonn á sekúndu miðað við sjö hundruð til átta hundruð tonn á sekúndu þegar gosið var í hámarki fyrstu þrjá dagana,“ sagði Magnús Tumi, sem kvað engar mælingar að styðjast við til að spá fyrir um framhaldið.

„Meirihlutinn af þessu efni hleðst upp í gíg við gosstöðvarnar og öskufall er lítið en aska getur borist víða ef það er sterkur vindur. Það er sennilegt að það versta sé afstaðið í þessu gosi, þótt það sé náttúrulega ekkert útlokað. Gosið getur hætt á morgun eða jafnvel mallað áfram mánuðum saman af svipuðum krafti og það gerir núna,“ sagði Magnús Tumi Guðmundsson.

gar@frettabladid.is