Syngja á HM-athöfn

Hljómsveitin Amadou & Mariam frá Malí, sem spilar á opnunartónleikum Listahátíðar Reykjavíkur í Laugardalshöll 12. maí, stígur einnig á svið á opnunarathöfn heimsmeistarakeppninnar í knattspyrnu í Suður-Afríku tæpum mánuði síðar, 10. júní.

Sveitin tengist HM sterkum böndum því hún samdi þemalag síðustu keppni sem var haldin í Þýskalandi. Á meðal annarra flytjenda á athöfninni verða Alicia Keys, Shakira, John Legend og hljómsveitin Black Eyed Peas, auk hóps afrískra tónlistarmanna. Talið er að um þrjátíu þúsund manns fylgist með athöfninni á Orlando-leikvanginum í Jóhannesarborg, fyrir utan þær milljónir sem sjá hana í beinni sjónvarpsútsendingu.