Jóhanna söng Helga nótt fyrir Monocle

„Þeir báðu mig bara um að koma og ég söng þarna fimm lög,“ segir Jóhanna Guðrún Jónsdóttir söngkona. Breska tímaritið Monocle bauð henni til London til að koma fram í útvarpsþætti tímaritsins sem það heldur úti í ansi glæsilegu hljóðveri sínu.

Starfsmenn Monocle eru ansi hrifnir af Jóhönnu því þetta er í annað sinn sem hún mætir í hljóðverið og syngur, hún gerði slíkt hið sama í fyrrasumar. Jóhanna flaug út strax á mánudagsmorgni eftir að hafa sungið á fernum Jólagesta-tónleikum í Laugardalshöllinni þá helgi. „En maður fær alveg svakalega góða meðhöndlun hjá þeim enda stórt tímarit og svo fékk ég að vinna með Friðriki Karlssyni, ég kalla alltaf í hann þegar ég er í London.“

Jóhanna söng tvö ný lög sem verða væntanlega á nýrri plötu. Og svo íslenska jólalagið Ó helga nótt. „Þeir báðu mig alveg sérstaklega um það, að syngja jólalag á íslensku.“ Söngkonan er ákaflega upptekin í mánuðinum en í kvöld koma Jólagestir Björgvins í heimsókn til Akureyrar. Jóhanna hefur hins vegar síður en svo fengið nóg af ferðalögum því hún hyggst heimsækja nokkrar kirkjur á landinu og halda litla tónleika ásamt kærastanum sínum, gítarleikaranum Davíð Sigurgeirssyni.

„Þetta eiga að vera svona fjölskyldutónleikar með hátíðlegum og poppuðum jólalögum í bland,“ en jólalag sem þau sömdu saman er farið að hljóma á öldum ljósvakans. Þau skötuhjú verða í Reykholti hinn 17. desember og svo verða tónleikar í Keflavík, á Grundarfirði og á Egilsstöðum.- fgg