Eyjafjallajökull: Icelandair breytir áætlun fyrir morgundaginn

Icelandair hefur tilkynnt breytingar á flugi á morgun, mánudaginn 10. maí, vegna áframhaldandi óvissu um hvort Keflavíkurflugvöllur verður opinn fyrir flugumferð.

Í tilkynningu frá félaginu segir að miðað við spár sé nú gert ráð fyrir að flug verði komið á áætlun á þriðjudagsmorgun. „Tengistöð millilandaflugsins til Bandaríkjanna og Evrópu verður í Glasgow á morgun, líkt og í dag og í gær. Sérstök flug eru síðan sett upp á milli Glasgow og Akureyrar fyrir farþega sem eru annað hvort að koma til Íslands eða fara frá landinu og eru rútuferðir í boði frá BSÍ," segir ennfremur.

Guðjón Arngrímsson upplýsingafulltrúi Icelandair segir að þrátt fyrir að um sé að ræða mikla röskun fyrir þúsundir farþega hafi þeir verið þolinmóðir, skilningsríkir og „almennt þakklátir fyrir að við gerum allt sem í okkar valdi stendur til þess að tryggja að þeir komist til síns áfangastaðar samdægurs."

Guðjón segir að allt starfsfólk þjónustuvers Icelandair hafi verið kallað út til að sinna viðskiptavinum. „SMS sendingar, tilkynningar á vef félagsins, tölvupóstar og tilkynningar til fjölmiðla eru nýttar til að reyna að ná til þeirra um 12 þúsund farþega af fjölmörgu þjóðerni um allan heim, sem eiga flug með okkur þessa þrjá daga, þ.e. í gær, í dag og á morgun."

Breytingarnar ná til alls flugs Icelandair á morgun, flug eru felld niður og ný flug sett upp í stað þeirra með tilliti til tengingarinnar í Glasgow. Þó er stefnt að því að flug til Boston undir kvöld á morgun verði frá Keflavíkurflugvelli.

Farþegar eru hvattir til að fylgjast með á heimasíðu félagsins.