Hrunið og skýrslan krufin í HÍ

Opnir umræðufundir verða í Háskóla Íslands í þessari viku með það fyrir augum að draga lærdóm af skýrslu rannsóknarnefndar Alþingis um hrunið og koma með ábendingar um mikilvæg framtíðarverkefni.

Fyrsti fundurinn verður í hádeginu í dag og er yfirskriftin Menning og samfélag - liggja þar rætur hrunsins? Fundurinn er í stofu 132 í Öskju.

Kristín Ingólfsdóttir rektor Háskóla Íslands mun flytja ávarp í upphafi fundarins í dag. Í framhaldinu mun Hulda Þórisdóttir lektor í stjórnmálafræði ræða efnahagshrunið sem afsprengi aðstæðna og fjötraðrar skynsemi. Þá fjallar Guðmundur Jónsson prófessor í sagnfræði um hrunið og hnattvæðinguna og erindi Guðmundar Hálfdánarsonar prófessors í sagnfræði, sem síðast talar, heitir Frjálsasta þjóð í heimi.

Fundurinn í dag er sá fyrsti í runu fimm slíkra sem allir verða í hádeginu í þessari viku. Í hverju hádegi verða flutt tvö eða þrjú 15 mínútna inngangserindi og í kjölfarið verða umræður og fyrirspurnir til fyrirlesara. Fyrirlestrar verði teknir upp og settir á vef HÍ.

Málshefjendur koma úr Hagfræðideild, Lagadeild, Sagnfræði- og heimspekideild, Félags- og mannvísindadeild, Stjórnmálafræðideild og Viðskiptafræðideild HÍ.

Fundarstjóri í dag er Anna Agnarsdóttir prófessor í sagnfræði.