Sofia Coppola sigraði í Feneyjum

Leikstjórinn Sofia Coppola hlaut Gullna ljónið á kvikmyndahátíðinni í Feneyjum um helgina fyrir kvikmynd sína Somewhere. Myndin fjallar um Hollywoodstjörnu sem reynir að ná aftur til ungrar dóttur sinnar. Með aðalhlutverk í myndinni fara Stephen Dorff og Elle Fanning.

Í frétt breska blaðsins Guardian segir að nokkuð hafi komið á óvart að mynd Coppola hafi verið valin besta myndin á hátíðinni. Gagnrýnendur voru ekki á einu máli um ágæti hennar en Quentin Tarantino, formaður dómnefndarinnar og fyrrverandi kærasti Sofiu Coppola, sagði þetta hafa verið einróma álit dómnefndarinnar. „Við komum alltaf aftur að henni, jafnvel þegar við vorum að tala um hinar myndirnar, af því að okkur fannst hún sýna að hverju við værum að leita í okkar Gullna ljóni."

Hér er sýnishorn úr Somewhere.

Meðal annarra verðlaunahafa var Vincent Gallo sem valinn var besti leikarinn fyrir kvikmyndina Essential Killing þar sem hann leikur afganskan hryðjuverkamann á flótta.

Hér er sýnishorn úr Essential Killing.

Ariane Labed var valin besta leikkonan fyrir hlutverk sitt í gamanmyndinni Attenberg sem fjallar um unga konu sem er hugfangin af heimildarmyndum Sir Davids Attenborough.

Hér er sýnishorn úr Attenberg.