Derek Zoolander vaknar til lífsins

Einhver heimskasta persóna hvíta tjaldsins er án nokkurs vafa fyrirsætan Derek Zoolander en þessi kvikmynd Ben Stiller varð að hálfgerðu kult-fyrirbæri því gagnrýnendur voru ekkert ýkja hrifnir þótt áhorfendur hafi oft velst um af hlátri yfir asnastrikum Zoolanders og vina hans.

MTV greinir nú frá því að Stiller sé að vinna að handriti fyrir nýja mynd um fyrirsætuna.

„Við erum að þróa hugmynd og þetta er allt saman á algjöru frumstigi en þetta verður gert,“ hefur MTV-vefurinn eftir Stiller. Að sögn leikarans er hugmyndin sú að bæði Zoolander og Hansel, sem leikinn var af Owen Wilson, séu gleymdir og grafnir í tískuheiminum og vilji ólmir komast aftur á kortið. Stiller bætir því við í viðtalinu að þetta sé einnig kærkomið tækifæri til að dusta rykið af einhverjum skemmtilegasta óþokka kvikmyndasögunnar, tískuvöruframleiðandanum Mugato, en það var Will Ferrel sem lék hann með eftirminnilegum hætti.

„Ef Will vill vera með, þá verður hann með.“