Górillur á plastströndinni

Þriðja plata Gorillaz heitir Plastic Beach og kemur út á mánudaginn. Dr. Gunni tékkaði á henni.

Damon Albarn og teiknarinn Jamie Hewlett, sem best er þekktur fyrir Tank girl, fengu hugmyndina að Gorillaz árið 1998. Pælingin var að búa til þykjustuband þar sem meðlimirnir yrðu teiknaðir af Jamie og Damon myndi semja tónlistina. Hugmyndin var eiginlega nútímaútgáfa af svipaðri hugmynd sem var í gangi í kringum 1970 þegar hið ofurgrípandi tyggjópopp var hvað vinsælast. Tyggjópoppið var samið og flutt af andlitslausu starfsfólki í hljóðverum, en fallegt fólk látið vera í framlínunni í „böndunum“. Stundum var notast við teiknimyndafígúrur eins og í „hljómsveitunum“ Banana Splits og The Archies, sem voru með stórsmellinn „Sugar, Sugar“ 1969.

Hugmyndin að Gorillaz gekk svona líka ljómandi vel upp. Fyrstu tvær plöturnar (Gorillaz (2001) og Demon Days (2005)) hafa selst í um 15 milljón eintökum og lög eins og Clint Eastwood og Feel Good Inc. hafa notið mikilli vinsælda.

Á nýju plötunni er allt við það sama. „Meðlimir“ Gorillaz eru enn þau 2D, Murdoc Niccals, Russel Hobbs og Noodle, og tónlistin sem Damon stendur á bak við fer út um víðan völl. Í grautnum má greina döbb, hipp hopp, raftónlist og britpopp – en þó má alltaf greina persónulegan keim Damons sjálfs, enda syngur hann sum lögin.

Báðar fyrri plöturnar voru með haug af spennandi tónlistarfólki sem lagði inn. Plastic Beach er engin undantekning, Górillur kalla til samstarfsfólk úr ýmsum áttum. Á plötunni leggur inn lið eins og Lou Reed, Mark E Smith úr The Fall, Gryff Rhys úr Super Furry Animals og Mick Jones og Paul Simonon úr The Clash, og ekki má gleyma Snoop Dogg, De La Soul og The Lebanese National Orchestra for Oriental Arabic Music. Þá eru þeir Bobby Wymack og Mos Def saman í fyrsta smáskífulagi plötunnar, „Stylo“.

Platan er létt og glaðleg og hún hefur fengið rífandi góða dóma. Tónlistardeild BBC og Q-tímaritið hafa slengt fullum húsum á hana. „Umfang og dýpt Plastic Beach er ískyggilegt. Þeir sem eru skúffaðir yfir því að Blur gerði aldrei „Hvíta albúmið“ sitt, þurfa ekki að leita lengra,“ segir á vefsíðu BBC og Q segir plötuna innihalda framsæknasta poppið sem þú munt heyra í ár.