Virtur leikhúsfrömuður á sýningu hjá Vesturporti

Joseph Melillo, einn af forsvarsmönnum BAM-leikhússins í New York, er væntanlegur til Íslands á morgun. Hann hyggst sjá tvær sýningar af Fást með Vestur­porti í Borgarleikhúsinu, skoða landið og hitta leikhópinn. Vestur­port er að fara með aðra sýningu, Hamskiptin, til New York í nóvember til að sýna í BAM-leikhúsinu og svo gæti farið að Fást yrði einnig sett upp í þessu virta leikhúsi.

Gísli Örn Garðarsson segist í samtali við Fréttablaðið reiðubúinn til að kvitta upp á það að Melillo sé einn af tíu áhrifamestu mönnunum í leikhúsheiminum um þessar mundir. „BAM-leikhúsið er fyrir þau leikhús sem eru að reyna að gera eitthvað öðruvísi og það sinnir því hlutverki fyrir allan Ameríkumarkað.

Þeir sem vilja græða peninga fara á Broadway, hinir reyna að komast að hjá BAM," útskýrir Gísli. Melillo virðist vera mikill aðdáandi íslenska leikhópsins því hópurinn setti einnig upp Woyzeck þar á sínum tíma. „Hann er samt að koma í fyrsta skipti til Íslands og ætli við förum ekki með hann eitthvað út fyrir höfuðborgarsvæðið og sýnum honum landið."

BAM-leikhúsið er í Brooklyn og var stofnað 1861. Hlutverk þess hefur alltaf verið að sýna leikhúsuppfærslur sem þykja framúrstefnulegar eða boða eitthvað nýtt. Fjöldi þekktra listamanna hefur sýnt leikhúsinu mikla tryggð, sænski leikstjórinn Ingmar Bergman sýndi verk sín hjá BAM-leikhúsinu og grunge-rokkararnir í Nirvana kynntu yfirleitt sitt nýjasta efni hjá BAM.

Vesturport er reyndar á faraldsfæti, heldur til Suður-Ameríku og sýnir Hamskiptin á einni stærstu leikhússýningu heims í Bógóta í Kólumbíu. Allur hópurinn fer út um miðjan mars en Gísli og Gunnhildur Gunnarsdóttir, framkvæmdastýra Vesturports, fara út á undan öllum því þau eiga bókaða fundi hjá tveimur leikhúsum í borg englanna, Los Angeles.

„Já, það eru tvö leikhús þar sem hafa áhuga á því að setja upp Hamskiptin með íslensku leikurunum, það yrði vissulega spennandi og okkur fannst bara tilvalið að nýta þessa ferð til að ræða við þau," segir Gísli.

freyrgigja@frettabladid.is